მსოფლიო

ნამდვილად არ ვაპირებ ალეკო ელისაშვილთან პოლემიკაში შესვლას,-ამის შესახებ განცხადება „ქართული ოცნება-დემოკრატიული საქართველოს“ აღმასრულებელმა მდივანმა ირაკლი კობახიძემ გააკეთა.

 „ქართული ოცნება-დემოკრატიული საქართველოს“ აღმასრულებელი მდივანი ირაკლი კობახიძე ალეკო ელისაშვილს „ნაციონალური მოძრაობის“ პროექტს უწოდებს.

 ირაკლი კობახიძის განცხადებით, ამის დასადასტურებლად არსებობს კონკრეტული მაგალითები, მათ შორის სპორტის სასახლის მიმდებარე ტერიტორია, რომელმაც გიგი უგულავას მერობის პერიოდში იერსახე დაკარგა, თუმცა ეს ფაქტი ალეკო ელისაშვილს არ გაუპროტესტებია.

 „სპორტის სასახლის მიმდებარე ტერიტორია არის ერთ-ერთი სიმბოლო ქალაქის დამახინჯების. სწორედ უგულავას მმართველობის პერიოდში ფუნდამენტურად დამახინჯდა ქალაქის იერსახე, გამწვანებაზე ზუსტად იგივე შეიძლება ითქვას. ერთ კონკრეტულ ლოკალურ ტერიტორიაზე ათი ათასობის ხე გაიჩეხა. თქვენ თუ შეგიძლიათ დამისახელოთ ერთი შემთხვევა მაინც, როდესაც ან ალეკო ელისაშვილმა, ან ნატა ფერაძემ, ან რომელიმე მათმა თანამოაზრემ გააპროტესტა ასეთი რამ, მაშინ მე შემიძლია ხელები ავწიო, მაგრამ ასეთი რამ რეალურად არ მომხდარა და მიზეზი ამ ყველაფრის ზუსტად ის იყო, რაც ვთქვი. ანუ, კონკრეტული პროექტები, რომელსაც ყავდა კონკრეტული დამკვეთები და სწორედ ამ პროექტების განმახორციელებლები იყვნენ მაშინაც ეს ადამიანები და ამ პროექტის განმახორციელებლები არიან ეს ადამიანები 2012 წლის შემდეგაც. ეს არის რეალური სურათი“,-განაცხადა პარტიის აღმასრულებელმა მდივანმა.

 ირაკლი კობახიძის თქმით, ალეკო ელისაშვილს არასოდეს გამოუხატავს პროტესტი იქ, სადაც ამას პრინციპული მნიშვნელობა ჰქონდა.

„ნამდვილად არ ვაპირებ ალეკო ელისაშვილთან პოლემიკაში შესვლას. კიდევ ერთხელ გავიმეორებს იმას, რაც უკვე ვთქვი- 2012 წლამდე ნამდვილად არ მახსოვს, არც ალეკო ელისაშვილის და არც მისი თანამოაზრებიის მხრიდან აქტიურობა. ზოგადად, ისიც შემიძლია გითხრათ, როგორ კეთდებოდა ის პროექტები, რომლის ერთ-ერთი განსახიერებაც არის მაგალითად ალეკო ელისაშვილი. კარგად მახსოვს ძალიან, თუ როგორ შეიქმნა ალეკო ელისაშვილისგან „რუსთავი2“-ის მიერ ხატი თბილისი გულანთებული ადამიანის. ეს ის დრო იყო, როდესაც „რუსთავი 2“-ის ეთერში ბუზი ვერ შეფრინდებოდა ნაციონალების ნებართვის გარეშე. ასე კეთდებოდა ეს პროექტები“,-აღნიშნა პარტიის აღმასრულებელმა მდივანმა. როგორც ირაკლი კობახიძემ აღნიშნა, იმ დროს, როდესაც ალეკო ელისაშვილი კონკრეტული პროექტების განხორციელებაში იყო ჩართული, პირადად იგი საკუთარ პრინციპულ პოზიციას გამოხატავდა.

 „ ყოველთვის ვიყავი ჩართული სამოქალაქო აქტივობებში. დაწყებული აქციებით და მიტინგებით, დამთავრებული სხვა ფორმებით. მათ შორის უნივერსიტეტში, სადაც მე ვასწავლიდი წლების განმავლობაში, ყოველთვის მკაფიოდ ვაფიქსირებდით ჩვენს პოზიციას. შეგახსენებთ, მაგალითად, რომ 2010 წელს მე ვიყავი ერთადერთი პროფესორი თბილისის სახელმწიფო უნივერსიტეტის, რომელმაც „ნაციონალური მოძრაობის“ მიერ კონსტიტუციაში შეტანილი ცვლილებები გააპროტესტა. ამის გამო მე დავისაჯე კიდეც და მაშინ, როდესაც ალეკო ელისაშვილი ახორციელებდა „ნაციონალური მოძრაობის“ პროექტებს, მე გამომაგდეს, ამ სიტყვის პირდაპირი მნიშვნელობით, თბილისის სახელმწიფო უნივერსიტეტიდან“,-განაცხადა პარტიის აღმასრულებელმა მდივანმა.

 (R)